Futsal Fever, Uminit sa Grand Finale ng PFF Futsaliga

ANG kauna-unahang season ng PFF Futsaliga, na inihandog ng Philippine Sports Commission (PSC), ay nagtapos nang buong sigla sa Philsports Arena habang umabot sa panibagong antas ang grassroots futsal sa Pilipinas kasunod ng matagumpay na pagho-host ng bansa sa kauna-unahang FIFA Futsal Women’s World Cup 2025.

Sa huling matchday crowd na umabot sa 1,154 manonood na pumuno sa galleries ng House of Futsal, milyon-milyong online views, at mga planong palawakin pa ang kompetisyon sa buong bansa, itinatag ng PFF Futsaliga ang sarili bilang isa sa pinakamahalagang legacy at grassroots development initiatives ng Philippine Football Federation (PFF) katuwang ang PSC.

Pinuri ni PFF President John Anthony Gutierrez ang tagumpay ng inaugural tournament at iginiit na isa sa pinakamalaking tagumpay ng Federation ang pag-usbong ng pambansang kultura ng futsal.

“Pinatutunayan ng tagumpay ng inaugural PFF Futsaliga na tunay nang nakuha ng futsal ang imahinasyon ng mga Pilipino matapos ang FIFA Futsal Women’s World Cup. Ang nasaksihan natin sa nakalipas na tatlong buwan ay ang pagsilang ng isang pambansang kilusan ng futsal na pinatatakbo ng mga kabataang manlalaro, paaralan, clubs, komunidad, pamilya, at mga tagasuporta na yumakap sa laro nang may hindi matatawarang passion,” ani Gutierrez.

“Lubos kaming nagpapasalamat sa Philippine Sports Commission, lalo na kay Chairman Pato Gregorio, sa paniniwala sa adhikaing ito at sa pagtransform ng Philsports Arena bilang House of Futsal ng bansa. Simula pa lamang ito. Sa pag-usbong ng mga regional Futsaliga plans sa Visayas at Mindanao, at sa pagbuo ng pathways tungo sa semi-professional at professional futsal, hindi kailanman naging mas maliwanag ang kinabukasan ng Philippine futsal.”

Si PSC Chair Patrick Gregorio, na personal na nanood ng finals, ay pinuri ang Futsaliga sa “pag-abot sa pinakamataas na international standards.”

“Ang tagumpay ng katatapos lamang na PFF Futsaliga ay malinaw na pagpapatuloy ng momentum na nabuo mula sa makasaysayang pagdaraos ng FIFA Futsal Women’s World Cup Philippines 2025. Pinatunayan ng tournament na iyon na ganap nang kayang mag-host ng Pilipinas ng world-class sporting events na tumutugon sa pinakamataas na international standards ng FIFA. Higit sa lahat, pinabilis nito ang transfer of knowledge sa event governance, technical operations, at sports management, na nagbigay sa mga Pilipinong propesyonal at institusyon ng mahalagang karanasan upang mas mapalakas pa ang kakayahan nating mag-organisa ng mga pandaigdigang kompetisyon nang may kumpiyansa at kahusayan. Bahagi ng lumalaking legacy na iyon ang Futsaliga — isang plataporma kung saan ang mga aral mula sa World Cup ay isinasalin tungo sa sustainable grassroots at elite-level development para sa Philippine futsal,” ani Gregorio.

Tumakbo ang PFF Futsaliga mula Pebrero 28 hanggang Mayo 17 at tampok dito ang 476 manlalaro mula sa 32 koponan na naglaban sa apat na dibisyon — U17 Girls, U17 Boys, Women, at Men. Kabuuang 144 na laban ang ginanap, kung saan karamihan — 75 laban — ay nagtapos sa pagitan ng tatlong goal o mas mababa, patunay sa pagiging kompetitibo ng liga at mabilis na pagtaas ng kalidad nito.

Malaki rin ang naging engagement ng torneo online. Umabot sa pinagsamang 19,000 views ang livestreams ng semifinals at finals sa PFF YouTube account, habang nakapagtala naman ang “PFF Futsaliga” Facebook at Instagram pages ng pinagsamang 6.7 milyong views sa buong torneo.

Namayagpag ang commercial youth club na Beach Hut FC sa U17 Girls’ Division matapos talunin ang Silangan FC Cainta, 5-0, sa finals. Nasungkit naman ng barangay-based club na Star FC ang U17 Boys’ title sa pamamagitan ng 9-4 panalo kontra EMA Bulacan Highlanders.

Sa Women’s Division, tinalo ng Far Eastern University (FEU) Lady Tamaraws ang Beach Hut FC, 4-1, habang sa Men’s Division, nanaig ang Azkals Development Club (ADC) laban sa Enderun Colleges, 5-4, sa isang nakakapanabik na championship showdown na umabot hanggang huling possession.

Kabilang sa mga distinguished guests na dumalo sa finals sina PSC Chairman Gregorio, PSC Commissioner Fritz Gaston, Robbie de Vera, Rizal First District Representative Mia Ynares, Pampanga Provincial Board Member Cherry Manalo, at aktres na si Andrea Brillantes.

Binigyang-diin naman ni Commissioner Gaston ang kahalagahan ng futsal bilang developmental platform para sa Philippine football.

“Ang futsal ay feeder program din para sa football. Sana ay hindi lamang ito manatili sa Metro Manila o Luzon dahil ang plano ngayon ay dalhin ang Futsaliga sa Visayas at Mindanao, at kalaunan ay magkaroon ng national program,” ani Gaston.

Unti-unti nang nahuhubog ang planong nationwide expansion na ito.

Kabilang sa mga pangunahing nanood sa finals sina Ernie Ortonio at Domingo Subo, na ang kani-kanilang regional football associations ay nagpaplanong magsagawa rin ng sariling Futsaliga tournaments.

“Excited kaming dalhin ito sa Mindanao, lalo na sa pamamagitan ng Davao Regional Football Association,” ani Ortonio. “Napakaraming futsal players sa Mindanao, at malaking tulong ito para sa football community doon.”

Pinuri rin ni dating national futsal player at Quezon City Sports Director Robbie de Vera ang kalidad at propesyonalismo ng liga.

“Napakaproud naming makita ang ganitong kagandang torneo na nilalaro sa isang mahusay na venue,” ani de Vera. “Noong panahon namin, sa makeshift courts lang kami naglalaro. Ngayon, makita ang mga Pilipinong manlalaro na nakikipagkumpitensya sa ganitong antas ay nagpapakita lamang kung gaano kalaki ang potensyal ng futsal sa Pilipinas.”

Binigyang-diin din ni Rizal Congresswoman Mia Ynares ang kahalagahan ng mga oportunidad sa futsal para sa mga kabataang atleta, lalo na sa mga probinsya.

“Malapit sa puso ko ang sports dahil nakatutulong ito sa paglutas ng maraming problema sa komunidad. Ang mga kompetisyong tulad nito ay nagbibigay-inspirasyon sa kabataan at nagbubukas ng oportunidad upang sila’y umunlad bilang atleta at bilang indibidwal,” aniya.

Nagpasalamat din si ADC playing coach at dating Philippine men’s national team captain Stephan Schrock sa platapormang ibinigay ng PFF at PSC.

“Lubos kaming nagpapasalamat na mayroon kaming entabladong tulad nito kung saan maaari naming ipakita at maipamalas ang aming pinaghahandaan,” ani Schrock. “Isang malaking shoutout sa PFF at PSC para sa inisyatibong ito.”

Nagluwal din ang inaugural season ng mga natatanging individual awardees sa lahat ng dibisyon. Ang bawat most valuable player — sina Azriella Casero ng Beach Hut U17 Girls, Franc Obias ng Star FC U17 Boys, Lenlen Cristobal ng FEU Lady Tamaraws, at Christian Gabriel Vendiola ng ADC — ay nagpakita ng potensyal na maaaring magbigay sa kanila ng pagkakataong matawag sa national team sa hinaharap.

Sa matibay nang pagkakatatag ng House of Futsal, nailatag ng PFF Futsaliga ang pundasyon para sa isang makabagong yugto ng Philippine futsal — isang panahong pinapalakas ng grassroots participation sa buong bansa. (PSC/HNT)