HATAW! D'yaryo ng Bayan hatawtabloid.com
TATLONG dayuhan at 14 Filipino ang nasakote ng National Bureau of Investigation – Special Action Unit (NBI-SAU) sa pagsalakay sa isang nagpapanggap na center office ngunit gamit sa “Love Scamming Activities”, “Pig Butchering”, at “Cryptocurrency Investment Fraud” sa arañaque City, iniulat nitong Martes.
Sa ulat, nabatid na noong 15 Mayo 2026, sinalakay ang ikatlong palapag ng isang gusali sa Multinational Village, kasabay ng pagsisilbi ng Warrant to Search, Seize, and Examine Computer Data (WSSECD) na inisyu ng Parañaque Regional Trial Court (RTC).
Dinatnan ng mga operatiba ang tila call center na setup na binubuo ng maraming computer workstation, mobile phone, internet router, at iba pang digital device sa isang silid at sa hiwalay na silid naman ay narekober ang computer na may naka-install na “AI SWAP 2” application — ang teknolohiya ng deepfake na kayang palitan ang mukha ng modelo sa love scamming.
Huli sa akto ang 17 suspek na aktibong gumagamit ng mga computer system at communication device noong panahon ng pagsalakay.
Sa forensic examination ng NBI-Digital Forensic Laboratory natukoy na mga dayuhan ang target biktimahin lalo na ang mga nakabase sa Estados Unidos, Bangkok, at ilang bansa sa Europa.
