Godwin Langbayan, Nag-uwi ng Bronze sa Jiu-Jitsu Fighting Class ng SEA Games

BANGKOK — Tinalo ni Godwin Langbayan si Rajae Dwight Del Rosario, 21-16, sa isang all-Filipino match upang makuha ang bronze medal sa jiu jitsu men’s -62kg fighting class sa Ronnaphakat Building sa Navaminda Kasatriyadhiraj Royal Thai Air Force Academy nitong Miyerkules.

Ibinigay ni Langbayan ang unang medalya ng Pilipinas sa jiu jitsu matapos ang isang mahabang araw kung saan nabigo ang kanyang mga kasama na makapasok sa medal matches sa men’s at women’s divisions pati sa duo classic competition.

Nakuha rin ng 36-anyos na si Langbayan ang kanyang pangalawang SEA Games medal, kasunod ng bronze sa kun bokator noong 2023 SEA Games sa Cambodia.

Ayon kay Langbayan, hindi sila nagbigay-daan kahit teammates sila ni Del Rosario.

“Against sa teammate natin, wala pa ring bigayan kasi nag-iisang medal lang ‘yung kukunin natin, so best of the best na lang ‘yung ginawa namin,” sabi ni Langbayan.

Natalo si Langbayan sa unang laban kontra kay Vietnamese Le Kien, 14-14, matapos siyang maparusahan dahil sa uncontrolled punch sa endgame. Pero bumawi siya at nanalo via ippon laban kay Khamkeo Vilayphone ng Laos.

Nakuha nina Thai athletes Suwijak Kuntong at Naphat Mathupan ang gold at silver, habang si Dao Hong Son ng Vietnam ang isa pang bronze medalist.