HATAW! D'yaryo ng Bayan hatawtabloid.com
RATED R
ni Rommel Gonzales
TINANONG namin si Ara Mina kung ano ang naramdaman niya na hindi siya nanalo sa 73rd FAMAS Awards na nominado siya bilang Best Actress para sa pelikulang Mamay: A Journey to Greatness?
“Okay, okay, siyempre okay lang kahit hindi ako pinalad kasi ma-nominate ka lang,” umpisang reaksiyon ni Ara.
“Sa dami ng mga movie nitong nakaraang taon, eh puwedeng maraming ma-nominate, pero mapili ka, sobrang ano na ‘yun, malaking factor.”
Akala nga ni Ara ay sa Best Supporting Actress category siya papasok.
“Yes, akala ko nga sa supporting ako, kasi support naman talaga ako sa pelikula.”
Ang mga nakalaban niya sa Best Actress category ay sina Judy Ann Santos, Kathryn Bernardo, Julia Montes, Rebecca Chuaunsu, at Marian Rivera.
“Noong nakita ko ‘yung ano (lists), sabi ko oh, okay, happy, nakaka-happy.”
Si Marian ang itinanghal na Best Actress para sa pelikulang Balota.
“Hindi ko nga napanood eh, pero I think she deserves it, nababalitaan ko sa reviews.”
Hindi man wagi si Ara ay happy siya dahil humakot naman ng award sa FAMAS ang kanilang pelikula.
“Oo nga! Kasi ‘yung story talaga, kakaiba ‘yung story ni mayor, kaya tinanggap ko rin ‘to.
“At saka nakita niyo naman ako, nag-Muslim outfit talaga ako riyan. Tapos ‘yung mga suot ko riyan na Jihab, kay wife talaga ni mayor ‘yun, pinahiram niya sa akin.
“First time ko nagsuot dito sa ‘Mamay’ ng ganon and then second time sa ‘Fatherland.’”
Limang major awards at dalawang special awards ang naiuwi ng Mamay: A Journey To Greatness at ito ay ang Best Supporting Actor (Jeric Raval); Best Production Design (Cyrus Khan); Best Cinematography (Gilbert Obispo); Best Musical Score (Neal “Buboy” Tan); Best Original Song (Hamon by Gerald Santos composed by Vehnee Saturno); Film Producer of the Year – Mamay Productions at Presidential Awardee (Hon. Marcos Mamay na alkalde ng Nunungan, Lanao del Norte).
May FAMAS trophy na si Ara.
“Yes, ‘Ang Huling Birhen sa Lupa.’”
Ipinalabas ang naturang pelikula ni Ara noong 2003 na itinanghal siyang FAMAS Best Actress.
