HATAW! D'yaryo ng Bayan hatawtabloid.com
TINALO ng Alas Pilipinas ang mas mataas na ranggong koponan ng Kazakhstan, 25-21, 25-15, 25-19, ngayong Araw ng Kalayaan (Huwebes) sa AVC Women’s Volleyball Nations Cup sa Hanoi upang muling makapasok sa semifinals ng parehong torneo kung saan nakamit ng Pilipinas ang tansong medalya noong nakaraang taon sa sariling bayan.
Ang Filipinas, na nasa ika-47 na puwesto sa mundo, ay papasok sa semifinals bilang top seed mula sa Pool A taglay ang 4-1 na panalo-talong kartada—kapareho ng Kazakhstan, na ika-31 sa FIVB rankings, ngunit napunta sa ikalawang puwesto matapos ang tiebreak.
Makakaharap ng Pilipinas ang Chinese Taipei sa semifinals sa ganap na 9:00 ng gabi (oras sa Maynila) sa Biyernes, habang magtatapat naman ang Kazakhstan at Vietnam sa alas-6:30 ng gabi sa Dong Anh Arena.
“Pagkatapos ng laban kahapon [kontra New Zealand], Kazakhstan na agad ang nasa isip namin paglabas ng court,” ani setter at team captain na si Jia de Guzman. “Alam naming matibay na kalaban ang Kazakhs at kailangang ilabas namin ang aming pinakamahusay.”
“Hindi ako makapaniwala—isang straight sets na panalo para sa amin. Sobrang proud ako sa mga teammates ko,” dagdag niya. “Malaking morale-booster ito para sa amin.”
Nag-ambag si Bella Belen ng 16 puntos at 11 magagandang receptions, habang sina Alyssa Solomon at Angel Canino ay nagtapos ng may 14 at 13 puntos, ayon sa pagkakasunod.
“May ilang beses na rin akong nakaharap ang Kazakhstan noon, at lagi silang may ibang set ng players,” ani Belen. “Pero naniniwala talaga ako na kaya naming talunin sila.”
Hindi nagpabaya ang Alas Pilipinas sa paghahanda bago ang laban kontra Kazakhstan, sa pangunguna ng Brazilian head coach na si Jorge Edson Souza de Brito na pinanatiling nakatutok ang koponan.
“Nasa top 4 na tayo, magiging mahirap ang laban,” sabi ni de Brito. “Ang mindset para sa semifinals ay pareho pa rin—maglaro nang maayos at samantalahin ang bawat oportunidad … susubukan kong hanapin ang mga kahinaan ng kalaban.”
Ayon kay Canino, na itinuturing na pinakakonsistent sa koponan, ikinagulat nila ang straight sets win laban sa Kazakhs.
“Hindi namin inasahan na tatlong sets lang ang laban. Malakas silang kalaban,” ani Canino. “Ang lahat ng pinagdaanan naming laban ay may mahalagang aral. At sobrang nagpapasalamat ako sa gabay nina Ate Jia [de Guzman] at Ate Dawn [Macandili-Catindig, libero].”
Nagtagumpay ang Alas Pilipinas sa harap ng maraming Filipino fans sa Vietnam na sabik na sumuporta at sumigaw ng “Happy Independence Day!” matapos ang panalo.
Ang host na Vietnam ang nagtapos na top seed sa Pool A na may 3-0 kartada, habang ang Kazakhstan ay nagtapos ng 2-1 sa preliminaries.
Nakakuha rin ng tatlong panalo ang Iran—isa rito laban sa Alas Pilipinas—ngunit nabigo silang makapasok sa semifinals matapos ang tie-breaker rule. (HNT)
