RATED R
ni Rommel Gonzales
NAKATUTUWA ang kuwento kung paano nakuha si Carmi Martin para gumanap na Naty sa pelikulang Isang Komedya Sa Langit.
Nahanap ng producer na si Rosanna Hwang si Carmi sa tulong ng isang… barangay chairman!
“Hinanap niya ako roon sa aming barangay chairman, ng Magallanes,” natatawang kuwento sa amin ni Carmi.
At hindi lamang iyon, pati ang co-star ni Carmi sa Isang Komedya sa Langit, ang beteranong aktor na si Jaime Fabregas, ay sa kapitan din ng village nila nakuha ng producer para sa pelikula. Magkapitbahay sina Carmi at Jaime.
Gaganap si Carmi bilang isang lola sa pelikula.
“Nagtitinda, biyuda at may inaalagaang apo,” nakangiting kuwento ni Carmi.
Apo niya rito si Aki Blanco na gaganap bilang si Marco.
Comic role ang mapapanood kay Carmi sa nabanggit na pelikula, pero may mga eksena siya ng iyakan sa pelikula na mapapanood sa mga sinehan sa May 28.
“Yes, mayroong drama, mayroon din comedy.”
Bukod kina Carmi, Jaime, at Aki ay nasa pelikula rin sina EA Guzman, Gene Padilla, at John Medina, sa direksiyon ni Roi Paolo Calilong, mula sa Kapitana Entertainment Media.
Mapapanood ang Isang Komedya sa Langit sa mga sumusunod na SM cinemas—SM North Edsa, SM Cebu, SM Southmall, SM Fairview, SM Manila, SM Davao, SM Mall Of Asia, SM Marikina, SM Aura Premier, SM Seaside Cebu, SM Megamall, SM Grand Central, SM Clark, SM Dasmariñas, at Greenhills Theater.
