Hiro Magalona nanghinayang sa pagkawala ni Ricky Davao

MATABIL
ni John Fontanilla

SOBRANG nalungkot ang aktor na si Hiro Magalona dahil pagkatapos mamaalam ng National Artist at Superstar Nora Aunor ay ang batikang direktor at aktor namang si Ricky Davao na pareho niyang nakatrabaho sa Little Nanay.

Ayon kay Hiro isa si direk Ricky sa sobrang bait na direktor at ‘di maramot sa pagbabahagi ng kanyang knowledge about showbiz.

“Grabe ang sobrang kabaitan ni direk Ricky sa buong taping namin ng ‘Little Nanay’ once ko lang siya nakita magalit sa set.

“’Yun ‘yung sobrang ingay sa set. So napilitan siya sumigaw kasi may hinahabol na eksena na ipalalabas, then biglang bulong na minsan kailangan daw magpakita ng ganoon para hindi ka abusuhin. Sabay ngiti, ganoon siya kabait at ka-cool na direktor. 

“Lagi lang siya nakangiti, sobrang goodvibes po sa set.”

Ang isa sa nagustuhan ni Hiro kay direk Ricky ay labis-labis na pagmamahal niya sa Industriya at pagiging galante sa pags- share ng mga knowledge niya tungkol sa showbiz. 

“What I loved about direk Ricky is ‘yung craft n’ya and passion sa pag- arte. We often have conversations about movies and tv shows, makikita mo roon ‘yung pagmamahal n’ya sa industriya.

“At sobrang generous niya sa pagsi-share niya sa aming mga baguhang artista ng lahat ng natutunan niya sa showvbz, kaya naman sobrang mami-miss ko siya.

“Thankful lang ako at nagkaroon ako ng pagkakataong makatrabaho siya at marami akong natutunan sa kanya.

“Isang malaking kawalan sa industriya ang pagkawala ni direk Ricky, na isa sa masarap na katrabahong aktor at direktor sa bansa,” giit pa ni Hiro.

Sa ngayon ay balik pag-arte muli si Hiro sa advocacy film na Sa Aking Mga Anak ng Dreamgo Productions na idinirehe ni Jun Miguel.