TINUPOK ng apoy ang isang residential-commercial building na matatagpuan sa kanto ng Bambang at Kalimbas St., sa Brgy. 317, Sta. Cruz, sa lungsod ng Maynila, nitong Linggo ng Muling Pagkabuhay, 20 Abril.
Itinaas ng mga awtoridad ang sunog sa ikalawang alarma na nirespondehan ng nasa 20 truck ng bombero.
Pinaniniwalaan ng Manila Fire District na posibleng nagsimula ang apoy sa isang kainan sa ibaba ng gusali.
“Kung makikita po natin ‘yong kalsada is malawak. Itinaas po natin ng second alarm kasi ito ay residential-commercial kaya ‘yong mga responder po natin ay mabilis. Nakatulong din po ‘yong kalsada,” pahayag ni F/SInsp. Cesar Babante, Station 5 Commander ng Manila Fire District.
Ayon sa panaderong si Raffy Turion, nasa loob sila ng gusali at gumagawa ng tinapay nang may nagsabing nasusunog ang gusali mabilis siyang lumabas kasama ng anim pa niyang mga kasamahan.
Tuluyang naapula ang sunog dakong 11:58 ng umaga kahapon.
Samantala, agad dinala sa pagamutan ang isang 37-anyos lalaking nasugatan sa sunog.
Dagdag ng Manila Fire District, tinatayang aabot sa P1.2 milyon ang inisyal na halaga ng pinsala ng sunog na patuloy na iniimbestigahan ang pinagmulan.
