HATAW! D'yaryo ng Bayan hatawtabloid.com
PATAY ang dalawang indibiduwal habang isa ang sugatan nang mauwi sa mainitang pagtatalo habang nag-iinuman sa lungsod ng San Jose Del Monte, sa lalawigan ng Bulacan, nitong Miyerkoles ng madaling araw, 26 Pebrero.
Batay sa ulat na isinumite kay P/Col. Satur Ediong, provincial director ng Bulacan PPO, nakatanggap ng tawag sa telepono ang San Jose Del Monte CPS hinggil sa insidente ng kaguluhan sa Brgy. San Pedro na agad nilang nirespondehan.
Pagdating sa lugar, natagpuan ng mga operatiba ang isa sa mga biktima na nakahandusay sa lupa habang ang isa ay inaatake ng suspek na kinilalang alyas Rigor gamit ang kutsilyo.
Sinubukan salakayin ng suspek ang mga nagrespondeng pulis, na nag-udyok sa isa sa mga opisyal na i-neutralize ang banta gamit ang kaniyang baril.
Lumabas sa inisyal na imbestigasyon na bago ang insidente, nag-iinuman ang isa sa mga biktima at ang suspek nang magkaroon ng mainitang pagtatalo na nauwi sa saksakan.
Dahil sa mga saksak sa iba’t ibang bahagi ng katawan, agad binawian ng buhay ang isa sa mga biktima habang ang isa ay nagawang madala sa sa ospital.
Nagalusan ang isa sa mga nagrespondeng pulis habang dinala sa ospital ang suspek na idineklarang dead on arrival. (MICKA BAUTISTA)
