Marian gustong bumalik ng Spain

RATED R
ni Rommel Gonzales

TAMANG-TAMA ang Ecran De Luxe Silicon Sunscreen Gel, isang uri ng sunscreen na ineendoso ni Marian Rivera (mula sa Luxe Beauty and Wellness Group ni Ana Magkawas) sakaling mag-beach silang mag-anak. 

Kaya natanong namin kay Marian kung may plano sila?

“Planong puntahan?  Actually wala pa,” sinabi ni Marian. “Minsan masaya kami na biglaan eh, ‘Wala kang schedule? Tara, alis tayo!’

“Iyan, may mga ganoon kami at saka ‘yung mga bata ngayon pumapasok eh, so, ‘pag may mga sem break lang, baka.”

Dalawa ang anak nina Marian at Dingdong Dantes, sina Zia at Sixto.

May isang lugar na gustong-gustong puntahan ang pamilya ni Marian.

“Actually napuntahan na namin, pero gusto kong ibalik uli kasi gusto naming bisitahin ‘yung tatay ko, kasi hindi pa niya nakikita si Sixto, si Zia lang ‘yung nakita niya.

“So baka kung mayroong pagkakataon, na mukhang malabo naman, pero ‘yun ‘yung siguro bibigyan ko ng chance na makapunta kami sa Spain.”

Bongga ang career ni Marian, blockbuster ang pelikula niyang Balota na nanalo rin siyang Best Actress sa Cinemalaya last year.

Kung papipiliin si Marian, box office or best actress?

“Both,” at tumawa ang aktres. “Bawal mamili.”