HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
TAAL na taga-Batangas pala si Lani Mercado. Ang pamilya niya ay taga- Ludlod, Lipa City at kamag-anak niya ang mga Rodelas, Garcia, Maralit, Linggao.
Nalaman namin ito nang maimbitahan siya bilang isa sa special guest sa isinagawang Mutya ng Lipa 2025 Coronation Night at Rigodon na ipinakilala ang Mutya ng Lipa, si Dana Annika Ku Wong.
Ani Lani, home coming ang pagbabalik niya sa Lipa na ang huling pagpunta roon ay nang gawin ang Bagong Pilipinas Serbisyo Fair.
“Naaalala ko pa a few years back, mayor pa noon si Ate Vi (Vilma Santos), not just once but twice nakapag-Rigodon na rin ako rito sa plaza. Ang aking tita na may-ari ng Lipa City Colleges, Tita Glecy Mojares, na ang mayor pa noon ay si Mayor Umals. Kaya masasabi ko na tuwing kapistahan hindi makokompleto ang aking taon na hindi dadalaw ang aming pamilya rito sa Lipa.
“Kaya ang aming pamilya ay napakalapit sa puso ng inyong lingkod,” turan pa ni Cong Lani ng Cavite.
“Isa rin po itong pasasalamat katulad ko na nadagit ng isang Caviteno sa katauhan ni Sen. Bong Revilla na alam po natin na isang senador na dating kasama ni Sen. Ralph Recto sa senado na naglilingkod din doon. Ako’y napaibig ng isang Caviteno at for around 38 years kami po ay nagsasama sa hirap at ginhawa. Parang samahan din lang po iyan ng Batangas at Cavite.”
Marami pang kuwento si Cong Lani at natawa kami nang bago kami magtungo sa plaza ay naghanap ito ng cravings niyang pagkain, iyong sumang puti. Kaya naman agad humanap si Joel Umali Pena, producer at artistic consultant ng San Sebastian: Isang Musical na itinanghal sa pag-uumpisa ng kapistahan ng Lipa at kaibigan ng aktres/politiko. At nang makakain ganoon na lamang ang kasiyahan ni Cong Lani.
Nagpapasalamat si Cong Lani na naimbitahan siya sa Rigodon na taon-taon ding ginagawa sa kapistahan sa Lipa.
Bukod sa Rigodon, nagkaroon din ng Payabangan Nights noong Linggo ng gabi at Lunes ng umaga ay isinagawa ang Grand Float Parade na maraming artista ang pumarada. Nariyan sina Luis Manzano, kasama ang asawang si Jessy Mendiola at ang kapatid na si Ryan Christian Santos Recto, ang mag-asawang Alex Gonzaga at Mikee Morada, Ronnie Liang, Queenay at marami pang iba.
Nagkaroon din ng Celebrity Basketball Exhibition Game na dinaluhan ng mga artistang tulad nina Jeric Gonzales, Jayson Gainza, Marvin Diamante, Archie Alemania, Pekto, Savior Ramos at iba pa,
At pagdating ng gabi, isang Big Night Concert ang isinagawa tampok sina KZ Tandingan at Jimmy Bondoc. Isinagawa rin ang Grand Fireworks Display sa SM City Lipa.
Matagumpay na naidaos ng Lipeno ang kanilang kapistahan na may tagline na #EatPrayLoveLipa.
