MA at PA
ni Rommel Placente
NAGLABAS na ng statement ang Manila International Film Festival na kanselado ang kanilang event na magaganap sana sa January 30 hanggang February 2 dahil sa naganap na napakalaking sunog sa Southern California. Iaanunsiyo na lamang ang panibagong date kung kailan isasagawa ang MIFF.
Marami naman ang sumang-ayon sa desisyon na ito ng MIFF dahil pagpapakita lamang ito ng pagdamay sa mga naging biktima ng nasabing wildfires.
Bago naman mangyari ang trahedya, excited pa sanang makadalo ang aktor na si Ruru Madrid kasama si Dennis Trillo at mga producer ng Green Bones, na sa Jan. 29 sana sila aalis.
Unang nabanggit ni Ruru na excited siya dahil maipalalabas sa LA ang movie nila ni Dennis at mapapanood ng mga kababayan natin. Ito rin aniya ay first time niya dapat sa Amerika, pero hindi na nga matutuloy.
