HATAW! D'yaryo ng Bayan hatawtabloid.com
Allan Sancon
EMOSYONAL ang katatapos na media conference ng bandang Aegis para sa kanilang nalalapit na Pre-Valentine Concert na pinamagatang Halik sa Ulan na gaganapin sa New Frontier Theater, Q.C. sa February 1 and 2, 2025.
Hindi mapigilan ng mga kapatid at co-band member na mapaiyak dahil ito ang unang major concert nila na wala na ang kapatid nilang si Mercy Sunot, na yumao kamakailan dahil sa sakit na cancer.
Napapabalitang si Lyca Gairanod ang ipapalit kay Mercy bilang bagong member ng Aegis. Madalas kasing kantahin ni Lyca ang mga awitin ng Aegis at ipinanalo niya ito sa isang pakontes. Kaya nilinaw namin sa grupo kung totoo nga ba ang issue sa pagpasok ni Lyca bilang bagong member ng Aegis at ipapalit kay Mercy.
“Ay hindi po. Wala pong ipapalit kay Mercy. Siguro po as guest lang po pwede, pero si Mercy po ay forever sa Aegis. Walang pwedeng pumalit kay Mercy.”
Tiyak magiging madamdamin din ang kanilang nalalapit na concert dahil magmimistulang tribute ito Kay Mercy at kakantahin nila ang mga sumikat at timeless song ng kanilang kapatid tulad ng Basang-Basa sa Ulan, Sayang na Sayang, Luha, Halik at marami pang iba.
Magiging guests ng Aegis ang mga batikan at magagaling na OPM Artist na sina Morisette Amon, Jona, Ogie Allcasid, Julie Ann San Jose at ang baguhang male group na Formula 5. This is directed by Frank Lloyd Mamaril and produced by Fues Advertising Inc..
