ARESTADO ng mga tauhan ng Philippine Drug Enforcement Agency (PDEA) ang isang drug den operator at dalawa niyang galamay sa isinagawang drug bust operation sa Road 1, Brgy. Minuyan 3, lungsod ng San Jose del Monte, sa lalawigan ng Bulacan, nitong Linggo, 15 Setyembre.
Kinilala ng PDEA Bulacan Provincial Office ang operator ng drug den na si Rudy Aguilar, 42 anyos; at kaniyang mga kasabwat na sina Jose Paulo Maesa, 34 anyos, residente sa Defense Village, Brgy. Minuyan 4; at Arnel Radan, 46 anyos, residente sa Brgy. Minuyan 2, pawang sa nabanggit na lungsod.
Nasamsam sa operasyon ang apat na sachet ng hinihinalang shabu na may timbang na 15 gramo at tinatayang nagkakahalaga ng P102,000; iba’t ibang drug paraphernalia, at ang buybust money.
Magkatuwang na isinagawa ang operasyon ng mga operatiba ng PDEA Bulacan Provincial Office, PDEA RO III Special Enforcement Team, at San Jose Del Monte CPS.
Kasalukuyang nakadetine sa custodial facility ng San Jose del Monte CPS ang mga suspek na nahaharap sa kasong paglabag sa RA 9165 o Comprehensive Dangerous Drugs Act of 2002. (MICKA BAUTISTA)
