NAKOMPIRMANG negatibo sa monkeypox ang 24-anyos lalaking binabantayan ng mga awtoridad ng lalawigan ng Northern Samar sa bayan ng Catarman.
Ayon sa magkahiwalay na advisory mula sa Provincial Health Office (PHO) at Municipal Health Office (MHO) ng Catarman nitong Linggo, 25 Agosto, nakararanas ang pasyente mga sintomas ng monkeypox, kabilang ang dalawang linggong lagnat, panghihina ng katawan, at vesicular rashes.
Ayon kay Dr. Myrna Trongcoso, Catarman municipal health officer, nagsagawa sila ng contact tracing at confirmatory tests upang matiyak kung mayroong monkeypox na walang naitalang travel history.
Samantala, mananatili sa Northern Samar Provincial Hospital sa Catarman ang pasyente dahil sa ibang karamdaman.
Ayon kay Rei Josiah Echano, hepe ng Provincial Disaster Risk Reduction Management Office, simula nitong Sabado, 24 Agosto, nasa nabanggit na pagamutan ang pasyente para sumailalim sa mga pagsusuri.
