Harlene ‘minura’ si Gloria Diaz

RATED R
ni Rommel Gonzales

AMINADO si Harlene Bautista na kinabahan siya ng sobra sa isang eksena sa pelikulang Lola Magdalena na minura niya ng malutong ang Miss Universe 1969 na si Gloria Diaz.

“Sobrang kabado, ako lang, kasi ‘yung…’di ba, puro mura ako roon.”

Nagkataon kasing ninang ni Harlene sa binyag si Gloria sa tunay na buhay.

“Ninang ko pa siya sa totoong buhay. Parang, ‘Oh my gosh, mumurahin ko ‘yung ninang ko’.

“So, parang ang hirap talaga. Ang hirap ng ganoong eksena, ‘yung mura-mura na malulutong.”

Bago raw kunan ang eksenang murahan ay nagpasintabi si Harlene sa Ninang Gloria niya.

“Noong pagdating sa ano, habang mine-make-up, ‘Ninang, mumurahin kita’, ‘Oo nga eh’, sabi niya,” at tumawa si Harlene, “alam niyo naman ‘yung pagsasalita niya, ang cute.”

Samantala, sa unang pagkakataon ay nag-collaborate bilang mga producer ang Heaven’s Best Entertainment ni Harlene at BenTria Productions.

“Si Bo kasi bale, nakasama na siya ni direk Joel (Lamangan) before, so pangalawa na niya ‘to”

Ang una ay ang pelikula noong 2021,  Ang Huling Baklang Birhen Sa Balat-Lupa na ang Heaven’s Best din ang producer.