NATAGPUAN ang katawan ng isang 52-anyos na babae, na pinaniniwalaang pinatay ng kanyang sariling asawa, sa isang abandonadang bahay sa Brgy. Villaflor, bayan ng San Isidro, lalawigan ng Isabela noong Sabado, 31 Mayo.
Ayon kay P/Maj. Grandeur Tangonan, hepe ng San Isidro MPS, natagpuan ng mga residente ng naturang barangay ang naaagnas nang katawan ng biktima matapos umalingasaw ang amoy mula sa lumang bahay.
Naniniwala ang mga imbestigador na maaaring pinatay ang biktima sa pamamagitan ng pagpukpok ng matigas na bagay tatlong araw bago matagpuan ang kanyang katawan.
Samantala, boluntaryong sumuko ang asawa ng biktima sa pulisya matapos matagpuan ang babae.
Ayon sa suspek, nag-ugat sa hindi pagkakaintindihan sa kanilang pamilya kaya niya nagawang mapatay ang kanyang misis.
Kasalukuyang nasa kustodiya ng pulisya ang suspek at nakatakdang sampahan ng kasong parricide.
Sa kahilingan ng pamilya ng biktima, hindi pinangalanan ng pulisya ang mag-asawa.
