NAG-DONATE kahapon, 20 Marso 2024, ng 30 bola ang Samahang Basketbolista ng Pilipinas (SBP) sa lokal na pamahalaan ng Pasay City, bilang suporta sa programang pampalakasan ng siyudad.
Ayon sa pamunuan ng SBP, hindi ordinaryong bola ang ipinagkaloob sa Pasay LGU dahil ginamit ang mga ito ng mga bigating international at NBA players noong 2019 FIBA Qualifiers na idinaos sa bansa.
Layon umano nitong bigyan ng inspirasyon ang mga kabataang Pasayeño na pag-ibayuhin ang interes at pagmamahal sa sports.
Personal na tinanggap ni Bb. Le-Anne Calixto Rubiano ang donasyon bilang kinatawan ng Ina ng Lungsod, Mayor Emi Calixto-Rubiano. Naroon din sa simpleng turnover sina City Administrator Atty. Peter Manzano at Chief of Staff Eric Peter Pardo. (EJ DREW)
