PATAY ang isang mister matapos pagsasaksakin ng kanyang kalugar sa Navotas City, kamakalawa ng umaga.
Dead on arrival sa Navotas City Hospital (NCH) ang biktimang kinilalang si alyas Alfredo, 45 anyos, residente sa Brgy., Tangos South, sanhi ng mga saksak sa iba’t ibang bahagi ng katawan.
Naaresto sa follow-up operation at ipiniit sa detention cell ng Navotas City police ang suspek na si alyas Victor, 43 anyos, mangingisda, residente rin sa nasabing lugar, nahaharap sa kasong Murder.
Ayon kay Navotas City police chief P/Col. Mario Cortes, dakong 9:10 am nang maganap ang pananaksak ng suspek sa biktima sa A. Cruz St., Brgy. Tangos South, na hindi pa rin natutukoy kung ano ang dahilan.
Matapos ang insidente, mabilis na tumakas ang suspek sa hindi natukoy na direksiyon dala ang ginamit na armas habang isinugod ang biktima sa nasabing ospital ngunit hindi na umabot nang buhay.
Sa isinagawang follow-up operation ng mga tauhan ng Police Sub-Station 2 sa pangunguna ni P/Cpt. Edward Adriano, naaresto ang suspek at nakuha ang isang patalim na ginamit sa pananaksak. (ROMMEL SALES)
