Patay ang isang lalaki samantalang nagtamo ng pinsala sa katawan ang kasama nitong dayuhan matapos atakihin ng grupo ng mga kalalakihang kostumer sa isang resto bar sa Marilao, Bulacan kamakalawa.
Sa ulat na ipinadala kay PColonel Relly B. Arnedo, provincial director ng Bulacan PPO, ang insidente ay naganap sa isang resto bar sa Brgy. Ibayo, Marilao, Bulacan na nagresulta sa pagkamatay ni Arnel Araneta na residente ng Bancal, Meycauayan City, Bulacan.
Sa nabanggit na insidente ay nagtamo naman ng pinsala sa katawan ang kasama ng biktima na si Yongsheng Guo, na mula Fujin, China at residente ng Greenhills East City, Mandaluyong City.
Napag-alamang matapos mag-inuman ang dalawang biktima sa resto bar ay bigla na lamang silang kinursunada at inatake ng mga suspek na pawang mga lasing.
Ang mga suspek na kaagad naaresto ng mga nagrespondeng tauhan ng Marilao MPS ay kinilalang sina Joshua Dilao, Daryl Jacob De Leon at Allen Nicolas Gepila.
Si Araneta na naisugod pa sa ospital ay idineklarang patay ng attending physician samantalang ang mga arestadong suspek na nasa custodial facility ng Marilao MPS ay nakatakdang sampahan ng kaukulang kaso sa hukuman.{Micka Bautista}
