Sa Batangas
LALAKI NAG-AMOK MAG-UTOL NA TANOD PATAY SA SAKSAK

PATAY ang dalawang barangay tanod na pinaniniwalaang magkapatid nang umawat sa isang lalaking naghahamok ngunit sila’y pinagsasaksak hanggang malubhang nasugatan sa Brgy. Bilogo, lungsod ng Batangas, nitong Linggo ng gabi, 11 Disyembre.

Kinilala ng mga awtoridad ang mga biktimang sina Ruben Torino, 52 anyos, at Robinson Torino, 50 anyos.

Ayon sa ulat, sinubukang awatin ng mga biktima ang nagwawalang suspek sa Purok Uno na kinilalang si Reinaldo Barangas, 48 anyos, dating sriver, residente sa Sitio Silangan, Brgy. Dumantay, sa nabanggit na lungsod.

Imbes magpaawat at sumuko, pinagsasaksak ni Barangas ang mga umaawat na tanod.

Nagawang bumunot ng baril ng nakatatandang si Ruben upang paputukan ang suspek ngunit mabilis na nakatakas patungo sa direksiyon ng Brgy. Paharang East.

Nagawa pang madala sa pagamutan ang mga biktima kung saan sila idineklarang dead on arrival.

Samantala, nagkasa ang pulisya ng manhunt operation laban sa suspek.

Narekober sa pinangyarihan ng krimen ang basyo ng bala ng caliber 9mm at caliber 9mm baril.