Mag-ama tinodas
3 LASING NA SUSPEK TIKLO, 1 PA TINUTUGIS

SUNOD-SUNOD na nadakip ang tatlong lasing na magkakaibigan na pinaniniwalaang responsable sa pagpatay sa isang lalaki at kanyang anak, habang pinaghahanap ang isa pa nilang kasama sa isinagawang follow-up operation ng mga awtoridad sa bayan ng Sta. Maria, lalawigan ng Bulacan, nitong Linggo ng gabi, 11 Disyembre.

Sa ulat na ipinadala ni P/Lt. Col. Christian Alucod, hepe ng Sta. Maria MPS kay P/Col. Relly Arnedo, provincial director ng Bulacan PPO, matagumpay na naaresto ang tatlong suspek sa maagap na pagresponde ng mga tauhan ng Sta. Maria MPS dakong 8:30 pm kamakalawa.

Kinilala ang mga suspek na sina Allan Quinao, 31 anyos; Ronnie Begornia, 38 anyos; at Rizaldy Ruiz, 33 anyos, ngayon ay nakapiit sa Sta. Maria MPS Jail, habang pinaghahanap ang isa pang suspek na kinilalang si Aguiela Quinao.

Lumitaw sa imbestigasyon, ang dalawang biktima na sina Ramon Inot at kanyang anak na si Rolan, matapos mag-inuman ay ihahatid pauwi ang kanilang kasamang si Eddie sa kanyang bahay.

Dito nila nakasalubong ang mga suspek na noon ay nasa ilalim ng impluwensiya ng alak, at walang dahilang pinagbubugbog ang mga biktima.

Sa gitna ng pagkakagulo, malubhang nasugatan ang dalawang biktima nang ilang beses pagsasaksakin ng isa sa mga suspek na si Aguiela na nagresulta sa pagkamatay ng mag-ama. (MICKA BAUTISTA)