BAGSAK sa kulungan ang isang miyembro ng “Limos Carnapping Group” na nasa talaan bilang rank no. 10 most wanted person (MWP) sa Pasig City matapos maaresto ng pulisya sa manhunt operation sa Caloocan City.
Kinilala ni Northern Police District (NPD) Acting District Director P/Col. Ponce Rogelio Peñones, Jr., ang naarestong akusado na si Romeo Catalan, alyas Estong, 36 anyos, at residente sa Barangay Maybunga, Pasig City.
Ayon kay Col. Peñones, nakatanggap ang mga operatiba ng District Special Operation Unit (DSOU-NPD) sa ilalim ng pangangasiwa ni P/Col. Erosito Miranda ng impormasyon na naispatan ang presensiya ng akusado sa Bagong Silang, Caloocan City.
Kaagad nagsagawa ang mga operatiba ng DSOU sa pangunguna ni P/Major Joseph Ulfindo at P/Capt. Melito Pabon, kasama ang NDIT RIU-NCR, RID-NCRPO, DID-NPD, at HPG-NPD ng joint intel-driven operation na nagresulta sa pagkakaaresto kay Catalan dakong 10:00 am sa kahabaan ng Phase 5 Package 3, Brgy. 176, Bagong Silang.
Ani P/Col. Miranda, si Catalan ay dinakip sa bisa ng warrant of arrest na inisyu ni Judge Maria Cheryl Laqui Ceguera ng Regional Trial Court (RTC) Branch 268 ng Pasig City sa kasong Robbery. (ROMMEL SALES)
