Wanted sa Bulacan, nanlaban sa QC-pulis, dedbol

PATAY ang binata na wanted sa kasong attempted homicide sa Bulacan makaraang makipagbarilan sa mga operatiba na nagsasagawa ng anti-illegal gambling operation sa Brgy. Payatas, Quezon City, ayon sa ulat kahapon.

Ang suspek ay kinilalang si Ramil Gruta Villegas, 21, alyas Ramboy, karpintero, binata, at residente sa No.  2650, Pinagkaisa St., Brgy.  Commonwealth, Quezon City.

Sa naantalang report ng Payatas Bagong Silangan Police Station (PS-13), ng Quezon City Police District (QCPD), bandang 9:45 pm noong 11 Nobyembre nang maganap ang insidente sa Block 7 Poinsettia St., Brgy. Payatas, sa lungsod.

Batay sa imbestigayon ni P/Cpl. Isaias De Pedro II, nagsasagawa ng anti-illegal gambling operation ang mga operatiba ng PS-13 sa lugar, nang bigla na lamang silang paputukan ng baril ng suspek.

Dahil dito, agad gumanti ng pamamaril ang mga nagulantang pulis at bagamat tinamaan ang suspek sa kaliwang tagiliran ay nagawa nitong tumakas nang parahin ang paparating na tricycle na minamaneho ni Alimar Pantao.

Nang makitang duguan ang sakay ay dinala ng tricycle driver ang suspek sa QCGH pero binawian din ng buhay bandang 5:45 am kahapon, 13 Nobyembre, ayon kay  Dr. Tetsuro Jake Hayase.

Kinalaunan, nalaman ng mga awtoridad na may warrant of arrest ang napatay na suspek sa kasong attempted homicide na inalabas ni Judge Ryan Philipp Liao Bartolome ng  Branch 1, Municipal Trial Court Branch 1 ng San Jose Del Monte, Bulacan. (ALMAR DANGUILAN)