BINAWIAN ng buhay ang dalawang empleyado matapos makoryente habang naglilinis sa isang fishpond nitong Lunes ng hapon, 7 Nobyembre sa bayan ng Lemery, lalawigan ng Batangas.
Kinilala ang mga biktimang sina Renante Batchar, 41 anyos, tagapakain ng hipon, residente sa Brgy. Talo-toan, Concepcion, Iloilo; at Mark Anthony Bethel, 22 anyos, residente sa Brgy. Nonong Casto, sa nabanggit na bayan sa Batangas.
Nabatid sa imbestigasyon, dakong 4:00 pm kamakalawa nang lumusong ang dalawang biktima sa fishpond upang linisin ito ngunit hindi nila alam na may live wire mula sa nakalubog na electrical pump.
Idineklarang dead on arrival ang mga biktima ni Dr. Divina Gracia Landicho sa Batangas Provincial Hospital.
Nagsagawa ng imbestigasyon ang Lemery MPS habang nakatakdang isailalim sa awtopsiya ang mga labi ng dalawang biktima.
