Kawatan tinangkang habulin Nursing student patay
NADAKIP ng mga awtoridad ang isang lalaking pinaniniwalaang nakapatay sa isang 18-anyos nursing student nitong Sabado ng madaling araw, 15 Oktubre, sa Brgy. Buaya, lungsod ng Lapu-lapu, lalawigan ng Cebu.
Kinilala ang suspek na si Rodel Cuizon, 42 anyos, at residente sa nasabing lugar habang ang biktima ay kinilalang si Johanna Xyrra Selim, 18 anyos, residente sa Brgy. Tayud, Liloan, sa naturang lalawigan.
Ayon sa inisyal na imbestigasyon, nilooban ni Cuizon ang apartment ni Selim at tumakas palayo dala ang cellphone ng biktima.
Hinabol ng kapatid na lalaki ng biktima ang suspek na kanya rin sinundan.
Nang makorner, binaril ni Cuizon ang dalaga na tumama sa kanyang kanang dibdib na naging sanhi ng kanyang agarang kamatayan.
Samantala, nadakip ang suspek sa follow-up operation na ikinasa ng pulisya sa bulubunduking barangay ng Buaya, sa lungsod ng Cebu.
Ayon sa pulisya, dati umanong nakulong ang suspek dahil sa pagkakasangkot sa ilegal na droga.
Nakatakdang sampahan ng kasong murder at illegal possession of firearm suspek ngayong araw, 17 Oktubre.
