Sa Indonesia
EXECUTIVE CLEMENCY KAY MARY JANE HIRIT NG FM JR., ADMIN 
HINILING ng Department of Foreign Affairs (DFA) ang executive clemency para kay Mary Jane Veloso, ang Pinay na nasa death row sa nakalipas na 12 taon bunsod ng kasong drug trafficking noong 2010.
Nakipagpulong si Foreign Affairs Secretary Enrique Manalo kay Indonesian Foreign Minister Retno Marsudi sa Jakarta, Indonesia noong Linggo sa sidelines ng state visit ni Pangulong Ferdinand Marcos, Jr.
“Foreign Minister Marsudi said she would consult the Ministry of Justice on the matter,” anang DFA sa isang kalatas kahapon.
Nabatid, mula nang madakip si Veloso noong 2010 ay pinagkakalooban siya ng consular assistance.
Hinatulan ng parusang kamatayan si Veloso noong Oktubre 2010 at noong Abril 2015 ay pinigil ang pagbitay sa kanya.
Ayon sa DFA, ang Philippine Embassy sa Jakarta ay kinuha ang serbisyo ng isang Indonesian law firm para magsilbing legal counsel ni Veloso alinsunod sa mga umiiral na batas sa Indonesia.
“Maayos ang kalagayang pangkalusugan ni Veloso sa Wonosari Women’s Penitentiary sa Yogyakarta,” anang DFA. (ROSE NOVENARIO)
