Sa Pangasinan
LOLANG SEXAGENARIAN NAHULOG SA MANHOLE, NASAGIP PERO NATODAS
ISANG lola, tinatayang edad 60-anyos pataas ang
binawian ng buhay sa ospital matapos mahulog sa isang bukas na manhole sa isang kinukumpuning kalsada sa bayan ng Infanta, lalawigan ng Pangasinan, nitong Sabado, 20 Agosto.
Inilarawan ng Pangasinan PPO ang biktima na isang babaeng nasa edad 60-anyos pataas, at nakasuot ng itim na kamiseta at pantalon.
Ayon sa nakasaksing si Angelo Pungos, 36 anyos, ng Brgy. Maya, naglalakad ang biktima sa gilid ng kalsada nang biglang nahulog sa bukas na manhole.
Nagtulungan ang pulisya at mga lokal na rescuers na iahon ang biktima mula sa manhole saka dinala sa pagamutan kung saan siya idineklarang dead on arrival.
Samantala, sinusuyod ng mga pulis ng Infanta ang mga nasasakupang barangay upang matukoy ang pagkakakilanlan ng biktima.
Hindi binanggit sa ulat kung ang manhole ay pag-aari ng water utility o telecommunication company.
