NAALARMA ang kababaihan sa Bulacan matapos mapaulat na may lalaking umiikot habang sakay ng motorsiklo at tinatarget ang mga babaeng naglalakad sa lansangan para dakmain ang malulusog na dibdib at saka haharurot para tumakas.
Huling naging biktima ng suspek ang isang 16-anyos dalagita sa San Rafael, Bulacan, na biglang dinakma ang dibdib habang naglalakad mag-isa sa kahabaan ng NIA Road mula Brgy. Ulingao papuntang Sitio Bacood, Brgy. Tambubong, dakong 8:33 am kamakalawa.
Inilarawan ng biktima ang suspek na naka-black jacket, lulan ng isang kulay orange na motorsiklong Honda Click ngunit hindi niya naplakahan.
Ayon sa biktima, biglang lumapit sa kanya ang lalaki kasunod ng pagdakma sa kanyang dibdib saka siya hinila ngunit mabilis siyang nakalayo sabay takas ng suspek.
Ang pangyayari ay nakunan sa CCTV kaya nakita ang suspek na lulan ng motorsiklo na gumawi sa Brgy. Sampaloc, pumasok sa service road patungong Grace Village at lumabas sa provincial road ng San Rafael.
Dahil sa huling pangyayari, si San Rafael Mayor Cholo I. Violago ay handang magkaloob ng pabuyang P100,000 sa makapagbibigay ng impormasyon sa pagkakakilanlan o lokasyon ng suspek. (MICKA BAUTISTA)
