HATAW! D'yaryo ng Bayan hatawtabloid.com
BAGAMAT baguhan, nasungkit ng baguhang Pinoy film director ang dalawang major film award sa dalawang international film festival sa India. Ang tinutukoy namin ay si direk Jeremiah P Palma na nagdirehe ng pelikulang Umbra.
Libo-libong pelikula mula sa iba’t ibang bansa ang nakalaban ni Direk Palma subalit siya ang nakakuha ng Best Director award.Siya ang itinanghal na Best Director sa Roshani International Film Festival na pinangunahan ng Film Education and Welfare Foundation sa Aurangabad, India at sa Venus International Film Festival 2022 (Hulyo 3, 2022).
Ginagamit ng festival ang media platform bilang instrumento para kumonek sa mga manonood sa iba’t ibang syudad, bansa, at kontinente.
Ito ang ikatlong taong isinasagawa ang festival, na nilahukan ni direk Palma na siyang director-in-charge sa Kapisanan ng Social Media Broadcasters ng Pilipinas Inc. (KSMBPI) Film Division, na nasungkit ang pangaral noong Hulyo 24, 2022 ng pelikulang UMBRA.
Bago sa FEWF, itinanghal muna siyang Best Director sa parehong pelikula sa Venus International Film Festival 2022 ( Hulyo 3, 2022).
Si Palma ay kilala rin sa tawag na Direk Miah na nagsimulang magdirehe ng music video at short films noong 2020. Ang kanyang film outfit, ang MAYA Film kasama ang KSMBPI Film Division ay nag-collaborate para sa produksiyon ng Umbra, isang indie film na ipinakita sa international film forum.
Ang dalawang international film awards na nakamit ni Palma ay malaking tulong upang lalong tumaas ang antas at kalidad ng pelikulang Filipino at magbubukas ng dagdag na oportunidad para sa industriya ng film industry.
Mapapanood din ang pelikula sa Pilipinas matapos maipalabas globally.
