Nic Galano, maganda ang direksiyon ng career sa guidance ni Doc Art

ALAM MO NA!
ni Nonie Nicasio

AMINADO ang guwapitong newbie singer na si Nic Galano na likas ang pagiging mahiyain niya. Obvious naman ito sa matipid niyang mga sagot sa mga tanong ng press sa kanya.

Pero kakaiba na kapag nasa stage ito at nagpe-perform. Obserbasyon nga ng maraming katoto sa panulat, nagiging tila halimaw pagdating sa kantahan ang transformation ni Nic. Bigay-todo kasi talaga ang kanyang performance na ikinabilib ng mga taga-press sa solo presscon na ibinigay sa kanya ng manager niyang ni Dr. Art Cruzada.

Ano ang wish niyang mangyari sa kanyang showbiz career and ano ang plano ni Doc Art sa kanya?

Tugon ni Nic, “Since naging passion ko po ang singing ay gusto kong makilala sa larangan na ito. Gusto kong makilala ako upang mas marami pa akong maging offers na mag-perform kung saan-saan.

“Gusto kong makapagpasikat ng sarili kong komposition at maipagmalaki ng aking lalawigan.”

Dagdag pa ng singer na tubong Tuguegarao City, Cagayan, “Ang magkaroon po ng single soon ang talagang nakalinya sa akin ayon kay Doc Art. I think they are working for it now for the arrangement of my original composition Tayong Dalawa.”

Kung mapunta sa kanya ang songs na ginawa ni Vehnee Saturno, ano ang magiging reaction niya?

Saad ni Nic, “Kung mapunta sa akin yung ginawang song ni sir Vehnee Saturno ay labis po akong magpapasalamat at matutuwa dahil ito ay isang malaking karangalan sa akin, dahil isa siyang kilala at batikang composer.”

Ang talented na si Nic ay naging qualifier sa 2018 Idol Philipppines. Kabilang sa hobbies niya ang photography, videoke singing, song composition, video games, at ball games. Siya’y varsity player din ng volleyball noong high school and sa college naman, naging skateboard champion ang 23 years old na si Nic sa local meets.

Si Nic ay endorser din ng Queen Eva Salon na patuloy na dumarami ang branches.

Abangan si Nic sa kanyang kauna-unahang concert na gaganapin sa Music Box sa August 11. Dito’y makakasama niya ang iba pang ARTalent artists na sina Dene Gomez at Trinity Band, plus surprise guests.