UTAS ang isang barangay chairman nang pagbabarilin ng hindi kilalang mga suspek sa Brgy. Andili, bayan ng Mawab, lalawigan ng Davao de Oro, nitong Lunes ng umaga, 20 Hunyo.
Kinilala ng pulisya ang biktimang si Elizalde Malcampo, chairman ng Barangay Kinuban sa karatig-bayan ng Maco.
Ayon sa salaysay ng mga nakasaksi, galing sa Andili Elementary School ang biktima, matapos ihatid ang kaniyang apo.
Nang pauwi na si Marcampo sakay ng kanyang motorsiklo, sinundan siya ng mga armadong lalaking magkaangkas sa itim na motorsiklong walang plaka.
Tinabihan ng mga suspek ang motorsiklo ng biktima saka walong beses na pinutukan ng baril.
Agad dinala sa Davao Regional Hospital ang biktima ngunit binawian ng buhay habang nilalapatan ng lunas.
Patuloy ang hot pursuit operation na ikinasa ng pulisya upang matunton at madakip ang mga responsable sa krimen.
