TATLONG paslit, edad 3-5 anyos ang nalunod sa isang ilog sa Brgy. San Miguel, sa bayan ng San Antonio, lalawigan ng Zambales, nitong Lunes, 28 Marso.
Kinilala ni P/Sgt. Noel Cunanan, imbestigador ng San Antonio MPS, ang mga biktimang sina Brietanya Alexa Ancho, 3 anyos; at kanyang mga pinsang sina John Andre Guania at Prince Nythan Ocol, kapwa 5 anyos.
Ayon kay Cunanan, huling nakitang buhay ang mga batang naglalaro sa pampang ng ilog na walang kasamang matanda dakong 2:00 pm, kahapon.
Pahayag ng mga nakasaksi, nakita ang mga katawan ng mga bata na palutang-lutang sa ilog ilang metro mula sa pampang.
Dinala ang mga biktima sa San Marcelino District Hospital sa kalapit na bayan ngunit idineklarang dead on arrival.
