Team Pagbabago inendoso ni Congw. Ocampo

PORMAL na inendoso ni 6th district congresswoman Sandy Ocampo sina Manila mayoral aspirant Atty. Alex Lopez, vice mayor candidate Raymond Bagatsing at buong Team Pagbabago ng Distrito 6 nitong Sabado, 12 Marso 2022 sa Punta, Sta. Ana, Maynila.

Ipinahayag ni Congw. Ocampo, walang ibang karapat-dapat na maging Mayor ngayon sa Maynila kung hindi si Alex Lopez.

Ayon kay Ocampo sobrang ‘qualified’ si Lopez, dahil isang kapitagpitagang abogado, professor, ekonomista, at may  magandang rekord ang buong pamilya sa Maynila.

Tahasang sinabi ni Ocampo na pinabayaan ni kasalukuyang VM Honey Lacuna-Pangan na malubog ang Maynila sa bilyon-bilyong pagkakautang.

Nagbiro pa si Congw. Ocampo, na halata ang pagiging masungit ni Honey at hindi bumababa sa Punta Sta. Ana.

Aniya, malamang ngayong eleksiyon maiisipan ni Honey na manikluhod sa mga residente ng Punta, Sta. Ana, na parte din naman ng Maynila.

Nagpapasalamat ang Team Pagbabago sa pangunguna ni aspirante Mayor Atty. Alex Lopez sa naging mainit na pagtanggap at walang sawang pagsuporta ng mga taga-Punta, Sta. Ana.

Sinabi ni Lopez, makaaasa ang lahat na malapit na nilang makamit ang tunay na pagbabago at kaginhawaan sa buhay.

Ani Atty. Alex, handa niyang suportahan ano man ang kulay ng isang politiko kung sa tingin niya’y makatutulong sa pag-unlad at pagbabago ng bansa o ng pamayanan.