PATAY ang tatlong batang magkakapitbahay makaraang malunod sa sapa habang malakas ang ulan sa Las Piñas City kamakalawa.
Kinilala ng pulisya ang mga biktima na sina Renz Lian Aquino, 7; Arkin Xavier Haresco, 9; at Alwayne Ross Tandoc, 12; pawang residente sa Bernabe Compound, Brgy. Pulanglupa Uno, Las Piñas.
Sa inisyal na imbestigasyon, magkasama ang mga biktimang naglalaro at naliligo sa ulan nang magkayayaang tumungo sa sapa pero lingid umano sa kaalaman ng kani-kanilang magulang.
Lumangoy sina Renz at Arkin at hindi naman sumunod si Alwayne na naunang sinabi sa kanila na malalim ito.
Nang makita ni Alwayne na sumisigaw at humihingi ng tulong ang dalawang kaibigan niyang nalulunod na pala dahil sa lakas ng agos sa sapa ay tinangka niyang sagipin pero siya man ay nalunod na rin.
Pinagtulungang sagipin at iahon ng mga residente ang tatlong biktima sa may malalim na hukay saka isinugod sa Las Piñas District hospital ngunit binawian na ng buhay. (MANNY ALCALA)
