Pinoy Tayo ni Rico Blanco nilapatan ng etnikong tunog

SHOWBIZ KONEK
ni Maricris Valdez Nicasio

ANGAT NA ANGAT ang bagong aregalo ni Rico Blanco sa awiting Pinoy Tayo. Bale ito ang anniversary version ng makabayang awitin na  Pinoy Ako na unang narinig taong 2005 mula sa bandang Orange and Lemons.

Ngayon, ang remake ni Rico ang magsisilbing official theme song ng nalalapit na Pinoy Big Brother (PBB) Kumunity Season 10.

Ayon music icon, ”It’s such an honor to do the song. Just what it stands for. The original version is so well-loved. This is a chance to rediscover it.”

Maririnig ang etnikong tunog sa panimula pa lang ng kanta sa bagong  Pinoy Tayo na komposisyon ni ABS-CBN Music creative director Jonathan Manalo kasama sina Clem Castro at Rico, na siya ring nagprodyus katulong si Jonathan bilang supervising producer.  

“Tinanong ko ang sarili ko ‘ano ba ‘yung ako’ and I put in all the small elements that my songs had throughout the years,” pagbabahagi ni Rico ukol sa naging inspirasyon niya sa paggawa ng bagong bersyon.

“Excited ako about that happiness na maibibigay ng kanta. It’s a very bright, upbeat song, and I kept that from the original version,” dagdag pa ng magaling na singer. 

Samantala, bukod sa pagiging theme song ng PBB, nakatakda ring maging lead single ang Pinoy Tayo ng 25-track album na ilalabas ni Jonathan bilang pagdiriwang ng kanyang ika-20 taon sa industriya.

Hindi pa rin makapaniwala ang multi-awarded singer at songwriter sa naging tagumpay ng kanta bilang statement ng Pinoy pride at sa patuloy nitong pag-angat sa damdamin ng mga Filipino mula sa iba-ibang henerasyon.

Ani Jonathan, ”I’m grateful na marinig mula sa iba’t ibang tao na naging bahagi na ang kantang ito ng soundtrack ng buhay nila.”

Masaya ring niyang ibinahagi na finally ay naisakatuparan na ang dream collaboration niya kasama ang isang icon at legend sa katauhan ni Rico.

Ani Jonathan kung gaano kahalaga ang kantang Pinoy Tayo para sa kanya sa panahon ngayon, ”Ito ‘yung gusto naming ibigay sa audience na mapagaan man lang ang pinagdaraanan nating lahat at magbigay ng pag-asa at inspirasyon individually and as a nation. And also to remind us na maraming reasons pa rin to celebrate ang ating pagiging Filipino.” 

Samantala, para sa mga nagnanais maging Pinoy Big Brother Kumunity Season 10 housemate, maaari nang mag-audition ang may edad 20 hanggang 40 bilang adult housemates hanggang September 30.