HIMAS-REHAS ang isang lalaki matapos arestohin ng pulisya dahil sa pangmomolestiya sa isang batang babae sa lungsod ng San Jose del Monte, lalawigan ng Bulacan, nitong Lunes, 21 Hunyo.
Sa ulat na ipinadala kay Bulacan police director P/Col. Lawrence Cajipe, kinilala ang suspek na si Rommel Cariaga, residente sa Brgy. Gaya-gaya, sa nabanggit na lungsod.
Nabatid, ang suspek at ang biktimang 13-anyos na Grade 7 pupil ay magkasamang nakatira sa isang bahay sa Brgy. Gaya-gaya kung saan naganap ang pangmomolestiya.
Dakong 3:00 am kamakalawa, habang mahimbing na natutulog ang biktima ay naalimpungatan siya nang maramdaman na may mga kamay na gumagalaw sa kanyang katawan.
Dito napamulagat ang biktima nang makita ang suspek na si Cariaga na handa siyang lapastanganin ngunit pinilit niyang manlaban upang ipagtanggol ang puri laban sa nakaambang panganib.
Sa pagpapagibik ng biktima, nagising ang mga kasama nila sa bahay kaya nataranta ang suspek na nagtangkang tumakas ngunit sa maagap na follow-up operation ay naaresto ng mga tauhan ng SJDM CPS. (MICKA BAUTISTA)
