PATAY ang hinihinalang tulak ng ilegal na droga matapos makipagpalitan ng mga putok laban sa mga kagawad ng Provincial Intelligence Unit at San Narciso municipal police station sa isinagawang drug bust nitong Lunes ng madaling araw, 8 Marso sa bayan ng San Narciso, lalawigan ng Zambales.
Kinilala ni P/BGen. Valeriano de Leon, sa ulat ni P/Col. Romano Cardiño ang suspek na si Rucel Toceno, alyas Dodong, top 8 priority-provincial level, sinasabing kabilang sa Ducusin Drug Group na kumikilos sa lalawigan at karatig na probinsiya.
Nabatid na naamoy agad ng suspek na tagilid ang kanyang sitwasyon kaya karakang kumuha ng buwelo at pinutukan ang katransaksiyong operatiba na mabilis na gumanti ng mga putok at kasamahang mga back-up na nagresulta ng kanyang pagkamatay.
Narekober ng mga nagrespondeng Scene of the Crime Operatives (SOCO) sa pinangyarihan ng krimen ang 21 pakete na naglalaman ng hinihinalang shabu, pistola na may magasin, apat na bala, cellphone, marked money, at Yamaha Mio na motorsiklo ng suspek.
(RAUL SUSCANO)
