HINDI nakaligtas sa pananambang ng armadong kalalakihan ang alkalde ng Calbayog City, sa lalawigan ng Samar, at ang kanyang dalawang police escort nitong Lunes ng hapon, 8 Marso, sa Laboyao Bridge, Brgy. Lonoy, sa nabanggit na lungsod.
Sinabi ni P/Lt. Col. Bella Rentuaya, tagapagsalita ng PRO-VII PNP, natanggap nila ang paunang ulat na napaslang si Mayor Ronald Aquino at ang dalawa niyang kasamang pulis.
Kinompirma ni Calbayog City Administrator Rosario Gonzaga ang kamatayan ng alkalde, ayon sa Philippine Information Agency-Samar.
Lumabas din sa inisyal na imbestigasyon na patungo sa Brgy. Lonoy si Mayor Aquino at ang kanyang mga escort sakay ng puting Toyota Hi-Ace van nang paulanan ng bala ng armadong kalalakihang sakay ng dalawang sasakyan dakong 5:30 pm.
Nagawang makaganti ng mga biktima na nauwi sa palitan ng putok hanggang mapatay ang isa sa mga suspek.
Simula 9:00 pm nitong Lunes, ikinasa ng Calbayog ang hot pursuit operation para sa posibleng pagkakadakip at pagtukoy sa pagkakakilanlan ng mga nakatakas na suspek.
Taong 2011, napaslang din ang noo’y alkalde ng lungsod na si Reynaldo Uy ng mga hindi kilalang suspek.
