SWAK sa kulungan ang dalawang sabungero makaraang abutan sa maaksiyong habulan nang maaktohang nagtutupada sa Malabon City, kamakalawa ng hapon.
Kinilala ang mga nahuling nagtutupada na sina Jigger Roque, 28 anyos, isang vendor, residente sa Mallari St., Brgy. San Agustin; at si Leo Amoroto, 30 anyos , fish porter ng Block 30 Lot 24 Phase 1B Brgy. North Bay Boulevard South.
Batay sa ulat ni P/SSgt. Jose Romeo Germinal, may hawak ng kaso, dakong 2:35 pm nang matiyempohan ang isang grupo ng mga kalalakihan na nagkukumpulan sa tupada.
Nadaanan ng mga tauhan ni P/Maj. Vencito Cerillo ng Sub-Station 5 ng Malabon City Police habang nagsasagwa ng Oplan Galugad ang mga suspek sa nasabing lugar.
Dito nagtakbuhan ang mga lalaki hanggang abutan ang dalawang suspek na may hawak na manok.
Nakuha ang isang patay na manok at halagang P2,179 na pusta habang nahaharap ang mga suspek sa paglabag sa PD 1602 Illegal Cockfighting. (R. SALES)
