HATAW! D'yaryo ng Bayan hatawtabloid.com
PATAY ang isang sundalong off-duty na aksidenteng nabaril ang sarili habang nakikipag-inuman sa kanyang mga kaibigan sa bayan ng Tukuran, lalawigan ng Zamboanga del Sur, nitong Linggo, 31 Enero.
Kinilala ni P/Capt. Jubain Grar, hepe ng Tukuran police, ang biktimang si Army Staff Sergeant Neil Gonzales, na ayon sa mga nakasaksi ay aksidenteng nakalabit ang kanyang kalibre .45 baril habang inilalagay ito sa safety mode.
Nabatid na kinuha ni Gonzales ang kanyang baril mula sa kanyang baywang at ililipat sa kanyang sling bag.
Natamaan ng bala ng kanyang sariling baril ang kaliwang bahagi ng ulo ni Gonzales na naging sanhi ng kanyang agarang kamatayan.
Kabilang si Gonzales sa 1st Infantry Division Training School ng Philippine Army sa kalapit na bayan ng Pulacan.
Napag-alaman na bumisita si Gonzales sa kanyang mga kaibigan sa Brgy. Sto. Niño, sa naturang bayan, habang off-duty.
