BINAWIAN ng buhay ang dalawang pasahero ng tricycle habang sugatan nang mabangga ng rumaragasang van sa Maharlika Highway, sa bayan ng Calauag, lalawigan ng Quezon, nitong Martes ng gabi, 19 Enero.
Sa ulat ng Calauag police nitong Miyerkoles, 20 Enero, kinilala ang mga namatay na sina Modesto Lazaga at Cesar Epa, kapwa pasahero ng tricycle na minamaneho ni Renato Oriendo.
Ayon sa ulat, mabilis na pinatatakbo ni Edwin Baretto ang minamanehong Toyota Hi-Ace nang lumipat ito sa kabilang lane habang paparating ang traysikel sa bahagi ng highway sa Brgy. Binutas, dakong 9:00 pm.
Agad namatay ang mga biktimang sina Lazaga at Epa habang sugatan ang driver nilang si Oriendo.
Kasalukuyang nasa kustodiya si Barreto ng lokal na pulisya habang inihahanda ang kasong reckless imprudence resulting in multiple homicides na isasampa laban sa kanya.
