Ex-barangay kagawad todas sa rider (Sa Biliran)

ISANG dating barangay kagawad ang namatay nang barilin ng hindi kilalang salarin sa bayan ng Naval, lalawigan ng Biliran nitong Huwebes, 7 Enero.

Kinilala P/Maj. Michael John Astorga, hepe ng Naval police, ang biktimang si Romeo Berdida, 55 anyos, residente sa Brgy. Larrazabal, na tinamaan ng bala ng baril sa likod at noo.

Ayon sa paunang imbestigasyon, kararating ni Berdida sa kanilang bahay matapos bumili ng feeds para sa kanilang mga alaga nang pagbabarilin ng suspek na sakay ng motorsiklo.

Patuloy ang imbestigasyon ng mga awtoridad upang matukoy ang pagkakakilanlan ng suspek at ang motibo sa likod ng pamamaslang.