Jessica, ipinasa ang State of The Nation kina Atom at Maki

Rommel Gonzales January 6, 2021 Showbiz

BAGONG tandem sa pagbabalita ang mapapanood gabi-gabi sa GMA News TV flagship program na State of the Nation kasama ang award-winning journalists na sina Atom Araullo at Maki Pulido.

Parehong bihasa sina Atom at Maki sa news reporting at marami na rin silang mga tumatak na coverage sa ilang taon nila bilang journalists. Si Atom, naging mukha ng pioneering mobile newscast na Stand for Truth na napapanood online. Si Maki naman, naging news anchor ng dating newscast ng GMA News TV na Balita Pilipinas Ngayon. Napapanood din silang humahalili sa ibang Kapuso news anchors kapag hindi sila nagre-report mula sa field. Patuloy din sina Atom at Maki sa paghakot ng awards sa mga dokyung ginagawa nila. Kaya naman tiyak kaming kompiyansiya ang GMA News pillar na si Jessica Soho na ilipat sa kanilang pangangalaga ang State of the Nation.

Excited na kaming makita ang pagsasanib-puwersa nina Atom at Maki na nagsimula na noong Lunes (Jan. 4). Mapapanood ang State of the Nation, weeknights, 9:15 p.m., sa GMA News TV.

Samantala, nais na lamang mag-focus ni Jessica sa Kapuso Mo Jessica Soho kaya nag-resign na sa State of the Nation.

Rated R
ni Rommel Gonzales