Navotas detainees sumailalim sa X-ray at CoVid swab test
NASA 200 detainees sa Navotas ang sumailalim sa X-ray at swab test para sa coronavirus disease 2019 (CoVid-19).
Ayon kay Mayor Toby Tiangco, humingi ng tulong sa pamahalaang lungsod ang Bureau of Jail Management and Penology (BJMP) – Navotas para sumailalim sa chest X-ray bago ang kanilang paglipat sa BJMP quarantine facility sa Bicutan, Taguig.
Ang mga detainee ay kasalukuyang nasa kustodiya ng Navotas City Police.
“Kinakailangan ng BJMP na ang mga detainee ay ma-X-ray muna bago ipadala sa Bicutan facility para sa 28-araw na quarantine. Pagkatapos, dadalhin sila sa Navotas City Jail.
Kapag napag-alaman na may problema sa baga ay ihihiwalay upang maiwasan ang pagkalat ng impeksiyon,” paliwanag ng alkalde.
Ang mga detainee ay mayroong X-ray sa ilalim ng Project HEAL (HEalthy and Active Lungs), isang programa ng Department of Health at pamahalaang lungsod ng Navotas sa koordinasyon sa USAID at Philippine Business for Social Progress.
“Bagaman ang BJMP ay humiling lamang ng X-ray, isinailalim na rin namin ang mga detainees sa CoVid-19 test upang matiyak na ligtas sila sa virus,” dagdag ni Tiangco.
Hanggang nitong 23 Nobyembre, ang Navotas ay nakapagsagawa na ng 39,980 swab tests o katumbas na 14.9 ng papulasyon ng lungsod.
Umabot na rin sa 5,252 ang total cases sa lungsod, 5,038 recoveries, 57 active, at 157 ang namatay. (ROMMEL SALES)
