Darna, gagawin munang teleserye 

NAPAGDESISYONAN ng Star Creatives na gawin munang teleserye ang Darna ni Jane De Leon at nakatakda itong ipalabas sa 2021 sa iWant TFC at saka lang susunod sa A2Z at Kapamilya channels.

Kasalukuyang inire-revise ang script nito para sa TV series hindi lang matukoy sa amin ng aming source kung isasama ang mga eksenang nakunan na ni Direk Jerrold Tarog sa pelikula. Remember naka-15 shooting days siya sa Darna the movie.

Hindi rin binanggit pa kung sino ang direktor ng TV series at hindi rin puwedeng si direk Jerrold dahil abala ito sa TBA Studio project niya. At higit sa lahat, sa pelikula ang kontrata nito at hindi sa telebisyon.

Inihinto ang shooting ng Darna movie kahit naka-15 days shooting na ito dahil sa Covid-19 pandemic na hindi naman puwedeng dayain ang mga eksena dahil sa ipinatutupad na health protocols na dapat 50 lang ang tao sa location para sa social distancing.

Pawang big scenes ang karamihang kailangan sa Darna bukod pa sa maraming talents din ang kailangan.

“Maraming fight scenes sa ‘Darna,’ maraming talents, maraming big scenes kaya mahirap ituloy sa limitadong tao lang,” say pa ng kausap namin.

FACT SHEET
ni Reggee Bonoan