PATAY ang isang binatilyo nang pagbabarilin ng mga hindi pa kilalang mga suspek sa Barangay 56, Zone 5, Tondo, Maynila nitong Miyerkoles.
Kinilala ang biktima na si Deejay Cabilin, 14 anyos.
Sa CCTV, makikitang nakaupo ang biktimang si Cabilin kasama ang isang grupo sa covered court sa tabi ng barangay hall, 11:00 pm nang dumating ang dalawang lalaking lulan ng motorsiklo.
Bumaba ang angkas at nilapitan si Cabilin saka ito pinagbabaril.
Nakatayo ang binatilyo at tumakbo papunta sa likod ng nakaparadang SUV pero binawian din ng buhay dahil sa mga tama ng bala sa ulo.
Sugatan din ang isang 16-anyos na babaeng pamangkin ni Cabilin na nadamay sa pamamaril.
Sa ulat, nasa barangay hall ang binatilyo nang mga oras na iyon nang ireklamo ng pananaksak umano sa isa pang menor de edad sa isang computer shop sa kabilang barangay.
Nangyari ang pamamaril habang hinihintay nilang dumating ang nagrereklamong pamilya.
Inaalam pa kung may kaugnayan ang pamamaslang kay Cabilin sa nangyaring saksakan.
Ayon kay Police Capt. Henry Navarro, hepe ng MPD Homicide Section, hindi nila mahagilap ang tatay na nagreklamo kay Cabilin nang puntahan ng mga pulis para sa follow-up.
