HATAW! D'yaryo ng Bayan hatawtabloid.com
SINO ba naman ang hindi magugulat sa panawagan ni Joey Ayala. Tinitingala siya sa larangan ng musika dahil sa mga musikang naiambag na niya sa industriya.
Pero ang salita niya sa Facebook, “ABS-CBN mahiya naman kayo. Bakit niyo ginagamit ang kanta ko?”
At ibinahagi niya ang isang YouTube video ng kanyang awiting Walang Hanggang Paalam.
Sa linggong ito na kasi magsisimula ang palabas na ang titulo ay Walang Hanggang Paalam na ihahatid ng Dreamscape Entertainment na magtatampok kina Angelica Panganiban, Paulo Avelino, Arci Muñoz, at Zanjoe Marudo kasama sina Cherrie Pie Picache at Jake Cuenca sa natatanging mga papel.
Sa teaser na totoo namang naging kaabang-abang ay napakalaki ng impact ng nasabing awit.
Ilang dekada na naming napakikinggan ang Walang Hanggang Paalam. Nang una nga itong umabot sa pandinig ko, sa panahong naaabot namin ang mga underground music may nagsabi pa sa akin na awit daw ‘yun kapag may mga rebeldeng ikinakasal sa kabundukan. Napakaganda namang talaga ng liriko ng kanta na siya ngang theme song ngayon ng nasabing palabas. Na sabi rin, Burdado ang orihinal na titulo.
Anyway, sa panawagan ni Mang Joey, ipinarating ko naman sa mga kinauukulan, sa Dreamscape, pati na kay Roxy Liquigan ng Star Music ang “buga” ng musikero.
Dahil dumarami na rin ang sari-saring komento sa kanyang thread.
Dagdag pa ng musikero, “’Di pala uso ang downpayment no…dahil siguro mailap ang showbiz. many unstable variables – title, casting, di magkasundo sa tf palitan ang script, etc. kaya the less outlay, the better. kaya most artists, nasa dulo na ng bayaran. Itaga muna sa bato bago maglabas ng ayudah! that’s the reality of the process. ganyan talaga, natural.”
Sagot niya ‘yan sa isa pang musikera, si Bayang Barrios na pinasubalian naman ang reklamo niya. Ang sabi nito, “Ang alam ko careful ang ABS-CBN sa mga ganito Jo, kasi may project kami dapat ‘Tres Marias’ di pa na-push dahil ‘di namin nahagilap ang composer ng kanta. Naka-hold ‘yung project..”
Pero wala pang isang oras, binura na ni Mang Joey ang kanyang “buga.”
“I just posted (and deleted) that ABS-CBN was using my song without permission. MY MISTAKE. Sorry. Put it down to a senior moment – it’s easy to forget deals made long ago. Friend-to-friend kasi. Sorry for the heart attacks!”
Malamang na nasagot na siya ng kinauukulan dahil may mensahe rin si Mang Joey na itong Lunes eh, babayaran siya.
Kaya, hindi dapat kinakalimutan ang paalala ng marami na, “think before you click!” Para nga kasi itong apoy na parang sunog kung kumalat.
Ipinadala rin sa akin ng nakausap ni Mang Joey sa chatroom nila ang paghingi nito agad-agad ng dispensa o paumanhin. Na ang pagkakaroon niya ng senior moment ang salarin.
Basta ako, pagkatapos ng Ang Sa Iyo Ay Akin, tututok talaga sa Walang Hanggang Paalam!
Naghanap ng paalam, walang hanggang paghingi naman ng paumanhin ang naging katapat!
Kaya sa nangyari, may natutuhan dapat!
HARD TALK!
ni Pilar Mateo
