PATAY ang isang babae nang masagasaan ng taxi habang naglalakad sa kahabaan ng Osmeña Highway sa kanto ng Zobel Roxas St., northbound, San Andres Bukid, Maynila nitong Lunes ng umaga.
Inilarawan ang biktima na nasa edad 50 hanggang 60, may kulay ang buhok, nakasuot ng printed shorts, t-shirt na may stripe na kulay pula at puti at may kulay asul na panali ng buhok sa kaliwang braso.
Ayon sa nakakita sa insidente na si Samson Patricio, naglalakad ang hindi kilalang biktima patungong kanluran ngunit pagsapit sa nasabing lugar ay nabangga ng taxi cab na patungong timog.
Agad huminto ang taxi cab at bumaba ang driver saka nilapitan ang biktima ngunit agad din bumalik sa minamanehong taxi at mabilis na pinatakbo ang kanyang taxi saka iniwan ang biktima.
Patuloy na inaalam ng mga operatiba ng Manila Traffic Enforcement Unit (MTEU) ang pagkakakilanlan ng tumakas na taxi driver.
