ARESTADO ang isang misis sa hot pursuit operation makaraang pagplanohang patayin sa pamamagitan ng pagsunog sa asawa noong Linggo ng madaling araw, 26 Hulyo, sa bayan ng Sta. Rita, lalawigan ng Pampanga.
Kinilala ni P/Capt. James Renemer Pornia, hepe ng Sta. Rita police, ang suspek na si Gisel Batas, 24 anyos, negosyante, residente sa Zone 3, Barangay San Isidro, sa naturang bayan.
Ayon sa ulat mula sa pulisya, walang awang sinunog ng suspek ang kaniyang asawang kinilalang si Vidal Batas, 25 anyos.
Binuhusan umano ng gasolina saka sinilaban ng suspek ang nahihimbing na biktima dakong 3:00 am.
Sa pahayag ni P/SSgt. Carlo Rey Reyes, may hawak ng kaso, ini-report ni Jojo Batas, dakong 5:00 am kamakalawa ang insidente na agad nirespondehan ng mga awtoridad na nag-ugat umano sa mainitang pagtatalo.
Mabilis na naitakbo ang biktima sa Jose B. Lingad Hospital ngunit idineklarang wala nang buhay dakong 1:00 pm noong Linggo.
Ikinasa ng mga awtoridad ang hot pursuit dakong 1:00 am kahapon, 27 Hulyo, na nagresulta sa pagkakadakip sa suspek sa bahay ng kaniyang mga magulang sa Zone 5, Barangay San Basilio, sa parehong bayan.
Kasalukuyang inihahanda ang kasong murder at parricide laban sa suspek na nasa kustodiya ng Sta. Rita Custodial Facility. (RAUL SUSCANO)
